പ്രണയമേ നീയെന്നെ പുണരൂ...!!
ഒരു പ്രളയമായ് നീയെന്നിലാഞ്ഞടിക്കൂ...!!!
പേമാരിയായും കൊടുങ്കാറ്റു തീർത്തും
എന്നിൽ താണ്ഡവമാടിത്തിമർക്കൂ...!
പ്രണയമേ.....നീയെന്റെ ചേതനയെ
ഉയിരോടെ ഉണർവിലേക്കുയർത്തൂ
സടകുടഞ്ഞെൻ മോഹ ഭംഗങ്ങളവിടെ
അനന്ത വിഹായസ്സിൽ പറന്നിടട്ടെ...!
പ്രണയമേ....നീയെന്നെ തഴുകിത്തലോടുമ്പോൾ
മനസിലൊരാലസ്യ ഭാവം
ആത്മ നിർവൃതിതൻ ലാസ്യ ഭാവം
ആ ഭാവത്തിൽ വിടരുമെൻ ഗീതം.
പ്രണയമേ....നീയെന്നിലലിയുമ്പൊഴെ
എന്നിൽ കണ്ണീരുപ്പു രുചിക്കൂ...
പ്രണയമേ....നീയെന്നെ തഴുകുമ്പൊഴെ
എന്നിൽ വിരഹാർദ്ര ഭാവം നിറയൂ...
മൃദുല ഭാവങ്ങളെൻ പ്രജ്ഞ പുൽകുമ്പൊഴെ
ഞാനെന്ന പൂർണ്ണത നേടൂ.....
പ്രണയമേ നീയെന്നെ പുണരൂ ...!!
ഒരു പ്രളയമായ് നീയെന്നിലലയടിക്കൂ....!!!
No comments:
Post a Comment