ഇടനെഞ്ചു തേങ്ങിപ്പിടയുന്ന നേരം
മിഴിമുന്നിൽ കാണുവാൻ മോഹം
നിറമിഴി രണ്ടിലും കതിരിടും കനവിന്റെ
പടിമെല്ലെ ചാരുവാൻ മോഹം.
ഇറയത്തായൊഴുകുമാ മഴവെള്ള പാച്ചിലിൽ
കളിവള്ളം തുഴയെറിഞ്ഞൊഴുക്കീ
കുതികൊണ്ട മോദത്തിൻ വാടാമലരുകൾ
അതിരില്ലാക്കടലിലേക്കൊഴുകീ
തളിരിടും നെല്ലിന്റെ കതിർകൊത്തി പായുന്ന
കിളികൾക്ക് കോലം വരയ്ക്കാൻ
പാടവരമ്പിലെ ആമാട കോട്ടയിൽ
കൈവിരൽ കൈകോർത്തിരിക്കെ
തുടികൊട്ടും മനസിന്റെ മാന്ത്രികച്ചില്ലയിൽ
അറിയാതെൻ പ്രണയം തളിർക്കെ
കുളിർകോരി മിഴി കൂമ്പി നിൽക്കുന്ന മാത്രയിൽ
നെറ്റിയിലധരം പതിക്കേ
സ്വരുക്കൂട്ടി വച്ചൊരാ കനവുകളെല്ലാം
ആകാശ ചിറകിൽ പറക്കെ
എങ്ങുനിന്നോ വന്നൊരുൽക്കയായ് വീണിട്ടെൻ
സ്വപ്നത്തിൽ ഗർത്തം ചമയ്ക്കേ
ഇന്നിടനെഞ്ചു തേങ്ങിപ്പിടയുന്ന നേരം
മിഴിമുന്നിൽ കാണുവാൻ മോഹം
നിറമിഴി രണ്ടിലും കതിരിടും കനവിന്റെ
പടിമെല്ലെ ചാരുവാൻ മോഹം